បារាំង៖ អាជ្ញាធរបារាំងនាថ្ងៃពុធនេះ បានធ្វើការហាមឃាត់ទៅកាន់អ្នកគាំទ្រក្លិបបាល់ទាត់ FC Basel សម្រាប់ការប្រកួតវគ្គ ៨ក្រុមចុងក្រោយជើងទីពីររវាងក្លិបបាល់ទាត់ FC Basel ទល់នឹងក្រុមម្ចាស់ផ្ទះ Nice នៃពានរង្វាន់ Europa Conference League ដើម្បីជៀសវាងការប្រឈមមុខដាក់គ្នារវាងអ្នកគាំទ្រក្រុមម្ចាស់ផ្ទះ និងអ្នកគាំទ្រក្រុមគូប្រជែង។

អភិបាលក្រុង Nice លោក Christian Estrosi កាលពីសប្តាហ៍មុនបានលើកទឹកចិត្តឱ្យអ្នករៀបចំ និងអាជ្ញាធរពាក់ព័ន្ធគប្បីធ្វើការហាមឃាត់អ្នកគាំទ្រក្រុមភ្ញៀវមិនឱ្យចូលរួមទស្សនាផ្ទាល់ការប្រកួតដែលនឹងធ្វើឡើងនាថ្ងៃព្រហស្បតិ៍នេះ។ កាលពីថ្ងៃអង្គារ ក្រសួង​មហាផ្ទៃ​បាន​ចេញ​បញ្ជា​ជា​ផ្លូវ​ការ​ដោយ​បញ្ជាក់​ថា​ការ​ប្រកួត​ក្រៅ​ដីរបស់ក្រុម FC Basel ជាញឹកញាប់តែងតែបង្កបញ្ហារំខានដល់សណ្ដាប់ធ្នាប់សាធារណៈ។ 

ក្រសួងមហាផ្ទៃបារាំងបានបញ្ជាក់បន្ថែមថា ទំនាក់ទំនងរវាងអ្នកគាំទ្រនៃក្រុមទាំងពីរដែលចែករំលែកមនោគមវិជ្ជានយោបាយប្រឆាំ ត្រូវបានគេកត់សម្គាល់ដោយភាពច្របូកច្របល់។ គួររំឮកថា ការប្រកួតជើងទីមួយរវាងក្រុមទាំងពីរកាលពីថ្ងៃទី១៣ ខែមេសាបានបញ្ចប់ទៅដោយលទ្ធផល ២-២។ ក្រសួងបានបញ្ជាក់ថា មុនការប្រកួតនៅឯទីក្រុង Basel ប្រទេសស្វីស អ្នកគាំទ្រនៃក្រុមទាំងពីរក៏បានបង្ហាញកាយវិការប៊ិះនឹងមានការប៉ះទង្គិចគ្នាផងដែរ។

គួរបញ្ជាក់ថា កាលពីឆ្នាំមុនអំឡុងពេលដែលក្រុម FC Basel ធ្វើដំណើរមកប្រកួតនៅទឹកដីរបស់ក្រុម Marseille ក្នុងការប្រកួត Europa Conference League វគ្គ ១៦ក្រុមចុងក្រោយ ក៏មានការប៉ះទង្គិចគ្នារវាង Ultras នៅក្រុមទាំងពីរផងដែរ។ ដោយឡែក កាលពីខែកញ្ញា ឆ្នាំ២០២២ អ្នកគាំទ្ររបស់ Nice ក៏បានប៉ះទង្គិចគ្នាជាមួយអ្នកគាំទ្រក្រុមភ្ញៀវ FC Cologne ដែលបណ្តាលឱ្យមនុស្សចំនួន ៣២នាក់រងរបួស៕